بقلم الشاعر المبدع / رأفت عبد العال
قالوا زمان الكلمة نور
من ضيها خاف الضلام
من كام وكام قمقم ضلام
بيسد في عروق الكلام
ويترسم فوق الركام قلبي
إللي شال دمع الحمام
وإيدين ترش الحزن خام
فرعين زيتون رمز السلام
وبقايا نكتة تقول كلام
متعلمة فروض الصيام
وحروف بتصرخ في منام
وكأنها بتقول كلام
فكوا القيود لاجل السلام
مصلوب على حد الملام
وسؤال بيصرخ في النيام
مين إللي باع مين إللي خان
مين إللي خلى النور ضلام
وسَحر عيون الفجر نام
ولا عادش يجمعنا إمام
قال يا لُطاف عيشوا خُفاف
زي العيدان جوه الغيطان
متعلمة لغة السلام
يوم الحصاد ملفوف لجام
على خصرها لاجل أما ينشف عُرفها
ويموت خضارها في حضنها
ويموت وليدها في قلبها
ويجف في عروقها الكلام
لابد يوم تصبح حطب
وتكون رماد لون السواد
ليبان مواسم فرحها
ولا ينكتب عن أي جرح في حزنها
قمقم يلم عظمها
والموت يخطف عمرها
ولا تنكتب ولا تنحكي
أي حكاية عنها
والنبض يغرق في غيام
وينولد من تحتها شبح الضلام
لابد يوم تصبح عدم
وتندفن بين الركام
