بقلم الشاعر اللواء / محمد هيكل
محتاجين لإيدين تطبطب …. محتاجين كلمة حنان
محتاجين في حياتنا فعــلا …. ناس تحسسنا بأمان
محتاجيـــن للطيبيـــــن ….. اللي فيهم شـوق و لين
واللي مهما تفوت سنين …. همه باقيين ع اللي كان
محتاجين ناس حاسه بينا .. ناس بتقرا اللي فعنينا
ناس معانا ….. مش علينا …… مهما دار بينا الزمان
.
ناس عيونهــم فيها طيبــه …. تشبه اللي فعين أبوك
ناس تشوفهــــم بعد غيبـه … غصب عنك يوحشوك
ناس تخلي الدنيـــــا رحله … يحضنوها و يحضنوك
ناس تكون من جوه أحلى … ناس أصيله ويشبهوك
محتاجين ناس مش ملايكه …. بس من جوه ملوك
.
يبقوا أهل ف وقت خنقه ……. من عيونك يفهموك
يبقوا ضهـــر ف أي زنقـه ……. وان وقعت يقوموك
ناس بسيطه وصافيه جدا..مايخونوش ولا بيعادوك
ناس تقـولك أسفـــــه جدا …….. لو في مره زعلوك
محتاجين ناس مش ملايكه …. بس من جوه ملوك
