الست لغز كبير

الشاعر اللواء / محمد هيكل

الست لغز كبير ………….. و السر ف الخلطه
ماتقولش انا فهمتها ……….. وتصدق الغلطه
الست بحر جنان …….. حسب المعامله تبان
ياتعيّشك سلطان ……….. ياتجيبلك الجلطه
.
الست مهما تخيب ……. بتبقى 100شاطره
و ف أنّتك دكتور …….. و ف دمعتك قطره
جامده لكل الناس ….. وتيجي فعنيك تطرى
وجمالها مش بالشكل …. دي جميله بالفطره
.
الست عُقد كريز ……… جوه الحنان ملفوف
الست دمعة أمل ….. وضحكة قمر مكسوف
عاوزاك تملّي تكون … فارس ب قلب حنون
الست عاوزه المعامله … والعشرة بالمعروف
.
بتحبك انت وبس …… وحطّاك سنين تاجها
مخلوقه أصلا كده ……… إخلاصها منهجها
أما انت قيس بالقوي..في دي و دي بتحتوي
وهيه اللي فاهمه قوي ….. وبتعدي بمزاجها
.
الدنيا لو لعبتك …………. هيه اللي فاهماها
والقوة لو غرتك ……………… القوه جواها
مانت اللي منها جيت …. وعليها ياماحفيت
فا امشي معاها عدل ……… و لايمها وياها
.

ضحكتها ليك هتدوم ….. وتكون ونس ليلك
دمعة عنيها ف يوم ………. هتلف و تجيلك
الست أخت وبنت …………… و أم تدعيلك
شيلها فحبابي عنيك ….. ف القلب هتشيلك
.
خدها نصيحة أخ
هيه جمل لو ..نخ .. إنت اللي هتشيل طوب
طبطب عليها بجد
متعيبش فيها لحد …. وانت اللي كله عيوب
على إيه بتتكالب
لو نمت يوم غالب ….. هتبات سنين مغلوب
ليه بس متعنتر
لو كنت 100عنتر ……… هترجعك شيبوب