إعداد / عبير سعيد
ناس كتير بتعمل حلويات جميلة .. بس تقولك أنا عقدتي البسبوسة
ليه بقا ؟ لأن في أساسيات لنجاح البسبوسة متعرفهاش طبعآ
.
صحيح الأول .. هي ليه أسمها بسبوسة ؟
لأن طريقة عملها بتحتاج «البس» ،
أي بس الدقيق بالسمن حتى يمتزجا تماما،
وأول حد أشتهر بصنعها هم العثمانيون.
هقولك على التكات والأسرار الخاصة علشان تحضري بسبوسة طريه زي الجاهزة بالظبط
أولاً .. لازم تشتري دقيق السمولينا (السميد) بدون أي إضافات و يكون نوعه كويس ومضمون ,
والزبادي يفضل يكون بلدي والسمنة تكون فلاحي
.
.. دقيق السمولينا بيحتوي على مادة الجلوتين مع تكرار التقليب بتنشط المادة دى و تخلي البسبوسة تنشف منك.
فيجب مراعاه تقليل التقليب للحصول على بسبوسة طريه
والمادة دي بتتفاعل مع اللبن أو الزبادي وتخلي البسبوسة تنشف .. عشان كده بنضيف الزبادى آخر حاجة وع الفرن السخنة ع طول
.. بيتم خلط دقيق السمولينا مع السمنة وأهم حاجة لازم تكون سمنة بلدي ودافية و بسيهم باليد ببطء خفيف وبيتم تغليف دقيق السمولينا جيداً لمنع تفاعله مع المواد الباقية
.
الشربات السخن بيخلي البسبوسة تشرب الشربات بسرعة
.
سر المحلات بقى .. رشة الملح الصغيرة مع السميد .. بيخليها روووعة
.
جوز الهند يكون ربع كمية الدقيق (يعني لو ٢ كوب سميد .. يبقى ربع كوب جوزهند)
ملعقة العسل الجلوكوز أو عسل النحل أو الشربات التقيل مع السمنة الدافية .. تخليها تمضغ وتبقى ماسكة نفسها
.
الشربات .. ودي أهم نقطة علشان بتحير ناس كتير لازم يكون الشربات (كوب سكر مع كوب ماء)
يتم وضعه على النار حتي الغليان و بعدين ضيفي عصرة نص ليمونه مع معلقة سمن بلدي واطفي
.وبيتم اضافتة على البسبوسة فور خروجها من الفرن و بعد كده بيتم تغطية البسبوسة جيداً للحصول على بسبوسة طرية (ال 2 سخن)
وتخليها جوه الفرن المطفيه
.
دهان الصينية بالطحينة بيديها لون جميل وتطلع قطع متماسكة
.
بيتم إدخال البسبوسة على درجة حرارة ١٦٠ عشر دقائق .. وبعدين ١٥٠ لمدة ثلث ساعة حتى الحصول على اللون الذهبي
.
قوام البسبوسة لازم يكون سميك و ليس خفيف
.
تتحط ف صينية منخفضة الجوانب ..
.
دي بقي تكه ليكي .. لما تلاقي البسبوسة شربت الشربات كويس يبقي أعرفي إنها نجحت و هتكون أحلى بسبوسة من إيدك
.
ودي مقادير مظبوطة للبسبوسة
نص كيلو سميد
رشة ملح ..
نص كوب جوز هند
نص كوب سكر
نص كوب سمن بلدي دافئ
او سيرب تقيل ٢ ملعقة عسل جلوكوز
تلتين كوب لبن دافئ
.
تبسي السمن مع المكونات الجافة بالراحة .. وبعدين تدوبي العسل ف اللبن وتنزلي ع السميد وتقلبي بالملعقة بحنية جدا
تحطيها ف صينية مقاس ٣٠ مدهونة
وع الفرن الساخن فورا
أول متطلع تسقيها بشربات سخن (2 كوب سكر .. 2 كوب ماء)
وتغطي وتدخلي الفرن المطفيه
