بقلم الشاعر / سامى النويهى
بلادى بجد واحشانى
فُراقِكْ سِرْ أحزانى
يقولوا فيكى مايقولوا
بكل مافيكى عَجْبانى
بصبرك واللى فاق الحد
بحالك مهما كان ع الأد
بناسك فى الهزار والجد
صحابى وأهلى وجيرانى
فى حلى قبل ترحالى
معايا فى كل أحوالى
لا حُضن سواكى يهنالى
ولا بَعْدِكْ وطن تانى
هواكى فى قلبى مِتْرَبَّع
وقلبى بحبك إتْطَبَعْ
أنا من شوقى بَتْقَطَّع
وبين الخلق وحدانى
وإيه الدنيا غير بيكى
ونظرة حب فى عنيكى
ياأم الدنيا كم ليكى
حبيب فى البُعد بيعانى
بلاد حطتنى وشالتنى
ومنك غصب أخدتنى
ومهما الغربه بعدتنى
ح يفضل فيكى عنوانى
