بقلم الشاعر / سامي النويهي
قالوها كتير وانا خالى
مجاش المعنى دا فــ بالى
ويوم مــــا ربنا ادالى
عرفت ان الضنا غالى
يابنى ومين فى غلاوتك مين
دا انت حبيب الروح والعين
نفسى أجيبلك م السما نجمه
نفسى عشانك اعيش عُمرين
يابنى ياقلبى ياضى عنيا
شمس نهارى ونور لياليا
إنت هديـــــــــة ربنا ليا
حُضنك فرحه ودفا وحنين
بنسى عشانك روحى وذاتى
أنا مشغول بك طول أوقاتى
أنا ليك واهب كل حياتى
أصل دا فرض عليا ودين
عشانك يابنى انا ببنى
وبعملك فى حُضنى بيت
عشان تسكن عيون قلبى
واشوفك زى مـــاتمنيت
وان حتى بان أثر السنين
وكبرت والضهر انحنى
ح افضل على حبك أمين
واللى عليه تسند .. أنــــا
